Sjots en Sjeif door de jaore
Wei houw dat gedach, mjer es 33 jaor geleeje, dat met eine gekke sjlaag unne blievende aafdruk achtergelaote zouw weure op de Meersjense carnaval? Toen, in ’t naojaor van 1988 zaote ein paar joonges bie de Gies aan ’t buffet. Met ein veersj teske doevesop en ein glaas beer woort get flauwekul gemaak, met es onderwerp de Meersjense carnaval wah weinig leeve mjeh in zaot. Wie later, wie gekker de ideeën, en inins waor ein nuuje carnavalsvereiniging geboore.
Wah menigeen die ideeën de volgende daag weer vergeten is, zwah neet deze joonges, zie heelte woort. Ein paar daag later woort Meersje via de Geulbode opgesjrik door de mededeling van de oprichting van eine nuuje carnavalsvereiniging in Meersje, met de naam Sjots & Sjeif. Ein vereiniging met joonges oet Meerjse met sjotse rökskes en papiere heudjes: de Sjuinsmarcheerdersj. Met bovendien eine prins Ronald 1 dei aankondigde dat heer bie de Gies zou weure oetgeroope tot de hjerste prins van deze vereiniging. Met veul belangstilling kaome de luuj nao Raor um te kieke wat zich hie zouw goon aafsjpeele. Want wei waor noe zu gek um ein vereingiging op te richten en van teveure de prins al bekind te maken? Mer zwa gebeurde ’t waal, en zwa waor de hjerste aovend van Sjots & Sjeif metein ’n grwat succes.
Mer veur Sjots & Sjeif waor dit nog neet genog. D’r mos aug weer ’n hjerrezitting komen in Meersje, en dei kwaom d’r. De zaal bie ’t Wapen van Meersje woord gans verboewd, en de mansluuj van Meersje wiste neet wat ze zaoge. Get boxen biejein geraap, beer oet de kranen en get doedelzak muziek: ein nuuj jaorlijks festijn waor geboore. Door de jaore heen zeen op de hjerrezitting allerleij artiesten op de bühne veurbie gekomen: van Sjeng Habets, Beppie Kraft, Ziesjoem en Taai Taai tot Big Benny, Erwin en Frans Theunisz. En natuurlijk neet te vergeten “danseres” Denise, die in de hjerste jaore menig mannenhart sjneller deeg kloppe. Tegenwoordig is de hjerrezitting van Sjots & Sjeif nog steeds ein begrip, neet mjeh in ’t Wapen van Meersje, mer in de Sjporthal. Eeder jaor is de zitting in raozend tempo oetverkoch, en nog sjteeds weite de joonges ein artiestengala neer te zetten datse nurges anders vings. Dit maak de hjerste zondig van januari veur de mansluuj van Meersje en umsjtreeke nog sjteeds de daag van ’t jaor.
Aug boete de hjerrezitting heit Sjots & Sjeif zich de aafgeloupe 33 jaor doon gelden in Meersje. Wat te dinken van de beruchte optochten in Meersje, vaak met witte sjtraote tot gevolg, of met chauffeurs die d’n dreij neet gemaak kreege. En wat te dinken van de evenementen die Sjots & Sjeif heit georganiseerd in Meersje, zuwie ’t feesprogramma tiedens ’t marathonweekend, met es hwagtepunt ein legendarisch optreije van “Queen”. Mer bovenal door te doon wah veur de vereiniging ooit bedoeld waor: leeve bringe in de carnaval in Meersje. Met sjpas en kameraodsjap veurop, en met ein gleiske aan de löp.
En noe, aan de veuraovend van ‘t 3×11-jaorig jubileum, bliek weer wie grwat de kameraodsjap en ’t clubgeveul is. Veur de organisatie van dit jubileum trek Sjots & Sjeif samen op met de stichting ‘2 x 11 jaor Sjuinsmarcheerdersj’, die nog besteit van ’t veurig jubileum en gevurmp weurt door ein gruupke mannen oet versjillende generaties van Sjots & Sjeif, die allemaol de vereiniging ein werrem hart toedraage. Veer goon d’r, samen met alle luuj van Meersje, ein geweldig feesweekend van maken! Door corona weliswar ein jaor later dan gepland, mer ’t geit noe eg gebeure. Want unne Sjuinsmarcheerder hilt woort!
Sjots en Sjeif Saluut
